కాక్రోచ్ జనతా పార్టీ (CJP) వ్యవస్థాపకుడు అభిజీత్ దీప్కే ఢిల్లీ పోలీసుల ప్రవర్తనపై తీవ్రస్థాయిలో ఆగ్రహం వ్యక్తం చేశారు. తనను అదుపులోకి తీసుకున్న సమయంలో పోలీసులు చట్టబద్ధమైన హక్కులను కాలరాశారని, తీవ్ర మానసిక క్షోభకు గురిచేశారని ఆయన నాగ్‌పూర్‌లో మీడియా సమావేశంలో ఆరోపించారు. ఎన్నిసార్లు జైల్లో పెట్టినా తమ పోరాటాన్ని ఆపే ప్రసక్తే లేదని, మళ్లీ రోడ్లపైకి వచ్చి ఉద్యమిస్తామని ఆయన హెచ్చరించారు.
ఫోన్ ఇవ్వలేదు.. లాయర్‌తో మాట్లాడనివ్వలేదు. దీప్కే ఆరోపణలు
అభిజీత్ దీప్కే వెల్లడించిన వివరాల ప్రకారం
ఢిల్లీ పోలీసులు తన వద్దకు వచ్చి తన నానమ్మ మరణించిన విషయాన్ని తెలిపారని, ఆ సమయంలో గ్రామంలో ఉన్న బంధువుకు (కజిన్) ఫోన్ చేసి వివరాలు తెలుసుకునేందుకు రెండు నిమిషాలు ఫోన్ ఇవ్వాలని కోరినా నిరాకరించారని చెప్పారు.
హక్కుల ఉల్లంఘన
తనకు నంబర్ గుర్తులేదని, ఫోన్ ఇచ్చి నంబర్ చూసుకునే వెసులుబాటు కల్పించాలన్నా అనుమతించలేదని ఆవేదన వ్యక్తం చేశారు. చట్ట ప్రకారం ఒక వ్యక్తికి తన న్యాయవాదితో (Lawyer) మాట్లాడే ప్రాథమిక హక్కు ఉన్నప్పటికీ, పోలీసులు న్యాయవాదిని కూడా సంప్రదించనివ్వలేదని తెలిపారు.
రాత్రి 3:30 గంటలకు తల్లిదండ్రులకు కాల్ చేయాలని ఒత్తిడి
అర్ధరాత్రి 3:30 గంటలకు నన్ను నిద్రలేపి, అరెస్ట్ అయ్యానని తల్లిదండ్రులకు ఫోన్ చేసి చెప్పమన్నారు. పగలంతా ఆ సమాచారం చెప్పకుండా, అర్ధరాత్రి ఆ సమయంలో వృద్ధులైన నా తల్లిదండ్రులను నిద్రలేపి షాక్‌కు గురిచేయడం ఏ రకమైన న్యాయపరమైన విధానం? అని ఆయన నిలదీశారు. అప్పటికే నానమ్మ మరణంతో కుటుంబం తీవ్ర విషాదంలో ఉందని పేర్కొన్నారు.
నియంతృత్వానికి లొంగేది లేదు: దీప్కే హెచ్చరిక
పోలీసుల తీరును తీవ్ర పదజాలంతో ఖండించిన దీప్కే, తాను ఎలాంటి బెయిల్ బాండ్లపై సంతకం చేయలేదని స్పష్టం చేశారు.
కేంద్ర ప్రభుత్వ పెద్దలు పోలీసు వ్యవస్థను ఒత్తిడిలోకి నెట్టి ఇటువంటి చర్యలకు దిగుతున్నారని విమర్శించారు.
ఒక్కసారి కాదు, వందసార్లు జైల్లో పెట్టినా ఈ నియంతృత్వానికి మేము భయపడబోం.. తిరిగి ప్రజాక్షేత్రంలోనే తేల్చుకుంటాం అని ప్రకటించారు.
ఢిల్లీ పోలీసుల స్పందన
మరోవైపు, నిరసనలు, శాంతిభద్రతల సమస్యలను దృష్టిలో ఉంచుకునే తాము చట్టపరమైన నిబంధనల ప్రకారమే చర్యలు తీసుకున్నామని ఢిల్లీ పోలీస్ ఉన్నతాధికారులు (DCP) స్పష్టం చేశారు.
కామెంట్‌లు లేవు:
కామెంట్‌ను పోస్ట్ చేయండి